جوميز مدرب صايع كرة.. والزمالك لا يمتلك إلا اللوجو وجماهيره
الجمعة 30/مايو/2025 – 12:04 م
تحدث محمود عبد الرازق شيكابالا قائد فريق الزمالك، عن تأثير رحيل البرتغالي جوزيه جوميز مدرب الأبيض السابق لتولي قيادة الفتح السعودي، كما تطرق للأزمات التي يعاني منها النادي.
شيكابالا يتحدث عن رحيل جوميز
قال شيكابالا في تصريحات إعلامية: جوميز مدرب صايع كرة والزمالك خسر برحيله لأنه كان يجيد التعامل مع اللاعبين والمباريات الكبرى، وكانت تعليماته لنا بضرورة امتلاك الكرة في الملعب بدلًا من الجري ورائها وبذل مجهود أكبر.
وواصل شيكابالا: بعد رحيل جوميز، كان يجب التعاقد مع مدرب يلعب بنفس الطريقة لكن تم الاستقرار على جروس، وبسبب اختلاف طريقة اللعب حدث خلل في الفريق والدنيا وقعت.
وأضاف قائد الزمالك: واجهنا صعوبة في التأقلم مع طريقة اللعب الجديدة، واستغرقنا وقتا طويلا حتى بدأنا نفهم الأسلوب، لكن الزمالك بحاجة إلى مدرب يلعب كرة هجومية لأنها هوية النادي التي تربينا عليها منذ صغرنا، حيث أن الجماهير تحب الأداء الجيد وتحزن إذا حققنا الفوز بدون أداء، عكس إذا خسرنا ونحن نلعب بشكل جيد.
وتطرق شيكابالا للحديث عن أزمات الزمالك، قائلًا: في ناس مش عايزة الزمالك يكون على الطريق الصحيح ويفضل جوا دوامة المشاكل، لأنهم عايشيين على دوامة المشاكل.
وتابع: الزمالك يتم محاربته من الجميع وكأنه يلعب في الدوري الإنجليزي، رغم أن الزمالك لا يملك إلا اللوجو وجماهيره، وعلى العكس فالجميع يساند الجانب الأخر ودا مش طبيعي، هل عايزين كرة قدم ولا فريق واحد هو الفائز دائمًا؟ إحنا نقفل الزمالك لو عايزين فريق واحد بس اللي بيكسب دايمًا.
وواصل شيكابالا تصريحاته: سعيد بوجود ميدو وحازم إمام في الزمالك لأنهم ولاد النادي، وبيحبوه وعايزين يساعدوا النادي بجد ومش بيمثلوا ولا مستنين حاجة، بس بنلاقي ناس جوه النادي عايزين يكسروا اللي بيشتغل، والناس بتسمع عن الدوشة من برة ومحدش عارف اللي جوه النادي.
واختتم شيكابالا: ممدوح عباس بيعمل كل حاجة ومش بيقول، هو اللي بيساعد اللاعبين يسافروا يتعالجوا برة مصر ويقعدوا بالشهور، وبيدفع الغرامات علشان أمنية حياته يتفرج على الزمالك وهو بيكسب.
