«حلقت شعري لوحدي».. نور الغندور تكشف أصعب فترة مرت بها بسبب الثعلبة

تحدثت الفنانة نور الغندور عن أصعب فترة مرّت عليها بسبب المرض، وإصابتها بـ «الثعلبة».

قالت نور الغندور عبر تصريحات تلفزيونية: «فترة مرضي كانت بالنسبة لي فصل جديد كنت بقفل صفحة وبفتح صفحة ومكنتش حاسة إني عايزة أطلع بيها للعلن مش هتفيد حد ولا هتفيدني».

وتابعت: «كانت في 2020 سنة كورونا، عيشت فترة طويلة في لبنان ومكناش قادرين نسافر وبعدها حصل انفجار مرفأ بيروت كانت في حاجات سلبية كتير حصلت ورا بعض وأنا شخص بيكتم جواه ومش بيعبر خوفًا على الناس اللي حواليا فجأة اكتشفت إني طلعلي ثعلبة وخسرت جزء كبير من شعري».

واستكملت نور الغندور: «أنا كنت لوحدي ومش عارفة أعمل إيه، وأنا باخد الصدمة وبحطها جوايا ولأول مرة ملجأتش لأهلي لو قلتهم خبر زي دا هيتأثروا أكتر مني».

وأضافت: «اللي عملته رحت للكوافير وطلبت يشيل شعري كله مش عايزة أشوف شعري، ومنزلتش دمعه وقلتله متأكدة 100% مش عايزة أشوف شعراية واحدة في شعري ومسك ماكينة الحلاقة وإيده بتترعش أنا بالنسبالة ممثلة ومعروفة بشعري، شالي شعري كله ومع كل ضربة في راسي في حاجة وحشة من جوايا بتتشال كل السلبيات اللي عيشتها».

واختتمت نور الغندور: «كنت عامله حسابي ومعايا باروكة شعر قصير وخرجت بيها كأنه نيو لوك، الموضوع مأثرش عليا بشكل سلبي أثر عليا بشكل إيجابي طويت صفحة وبدأت صفحة جديدة وبكيت أول مرة لما رجعت وأنا لوحدي ولما قابلت أهلي وشافوني، بس في ناس بتمر بأمراض أصعب من كده بكتير وبتتعايش مش هنقف عند أبسط حاجات ربنا مدينا حلول ليها ونزعل، التجربة دي علمتني الإيمان والقوة».